Noyabrda diplomatiya masası qurulur: Ukrayna, ABŞ və Rusiya üçtərəfli görüşə hazırlaşır
Ukrayna, ABŞ və Rusiya noyabrın birinci yarısında danışıqlar heyətləri səviyyəsində üçtərəfli görüşün keçirilməsi barədə ilkin razılığa gəliblər.
“Realist.az”ın məlumatına görə, bu barədə Ukrayna Prezidenti Volodimir Zelenski ABŞ prezidentinin nümayəndələri Stiven Uitkoff və Cared Kuşner ilə aparılan təmasların yekunlarına dair bəyanatında bildirib.
Oslo və Sankt-Peterburq görüşlərinin yekunları müzakirə olunub
Zelenski qeyd edib ki, tərəflər bundan əvvəl Oslo və Sankt-Peterburqda baş tutan təmasların nəticələrini və diplomatik prosesin irəliləmə imkanlarını nəzərdən keçiriblər.
Ukrayna dövlət başçısı oktyabr ayında planlaşdırılan analoji görüşün baş tutmamasında Moskanı ittiham edib və vurğulayıb ki, sülh prosesində real tərəqqi əldə etmək üçün Vaşinqtonun Rusiyaya təzyiqi artırılmalıdır:
“Məsləhətləşmələrin növbəti mühüm mərhələsi bilavasitə liderlər səviyyəsində həyata keçirilən danışıqlar olmalıdır.”
“Starlink” məhdudiyyəti və raket tədarükündə yaranan gecikmələr
“Hudson Institute” beyin mərkəzində çıxış edən Zelenski müdafiə sahəsində yaşanan bəzi texniki və loqistik problemlərə də diqqət çəkib.
O bildirib ki, Rusiyanın hər gün təkrarlanan ballistik raket zərbələrindən müdafiə olunmaq üçün raket-ələ keçiricilərin (HVM) tədarükündə ləngimələr var. Eyni zamanda front bölgəsində “Starlink” və “Starshield” peyk rabitə sistemlərinin sürətinə tətbiq edilən məhdudiyyətlər müdafiə əməliyyatlarını çətinləşdirir.
Bununla belə, Ukrayna Prezidenti ordunun cəbhə xəttini qətiyyətlə saxlamağa davam etdiyini xüsusi vurğulayıb.
© realist.az
Arzu, təklif və şikayətlərinizi bizə bildirin