Fransada kütləvi etirazlar QIZIŞDI: 100 mindən çox insan küçələrdə, 121 nəfər saxlanıldı

Bu gün Fransada qiymət artımına və polis zorakılığına qarşı keçirilən kütləvi etiraz aksiyaları zamanı 121 nəfər saxlanılıb.

Realist.az BFMTV telekanalına istinadən xəbər verir ki, bu barədə ölkənin Daxili İşlər Nazirliyi (DİN) məlumat yayıb. Nazirliyin hesablamalarına görə, ölkə üzrə nümayişlərdə təxminən 106 min nəfər (o cümlədən Parisdə 24 min nəfər) iştirak edib. Aksiya təşkilatçıları isə etirazçıların sayının 200 min nəfərə çatdığını bildirirlər.

Həbslərin əsas səbəbləri açıqlandı

İlkin məlumatlara əsasən, saxlanılmalar əsasən silah kimi qiymətləndirilə biləcək əşyaların gəzdirilməsi, təhqir, ayrı-ayrı rayonlarda olmaq qadağasının pozulması və icazəsiz nümayişlərdə iştirak halları ilə bağlı həyata keçirilib.

Paris və Nantda polislə şiddətli toqquşmalar yaşanıb

Paytaxt Parisdə nümayişçilərlə polis arasında qarşıdurma yaranıb. Asayiş keşikçiləri kütləni dağıtmaq üçün gözyaşardıcı qazdan və səs-küylü qumbaralardan istifadə ediblər. Nant şəhərində isə etirazçılara qarşı su şırnaqları tətbiq olunub.