Bu ilin oktyabr ayında fərdi yaşayış evlərinin satış bazarında 5% artım müşahidə olunub.
Realist.az-a Azərbaycan Qiymətləndiricilər Palatasından (AQP) verilən məlumata görə, oktyabrda bu seqment üzrə AQP indeksi 104,7-yə yüksəlib.
Sentyabr ayının göstəricisi ilə müqayisədə satış bazarında 5% artım qeydə alındığı halda, median normallaşdırılmış AHU göstəricisi 670,2, median ümumi satış təklifi isə 197 min manat təşkil edib. Palatadan bildirilib ki, AHU göstəricisi yaşayış evlərinin sahə və digər xüsusiyyətlərini nəzərə alan normallaşdırılmış ölçüdür və manat/kvadratmetr qiyməti ilə eyniləşdirilməməlidir.
Kirayə bazarında kəskin azalma: 42,3%-lik düşüşün səbəbi nədir?
Fərdi yaşayış evlərinin kirayə bazarında isə tam əks proses müşahidə olunub. Sentyabrda 123,3 səviyyəsində olan indeks oktyabr ayında 71,1-ə düşərək 42,3% azalıb. Median kirayə qiyməti 5,33 manat/kvadratmetr olub.
AQP bu kəskin dəyişmənin eyni xüsusiyyətlərə malik evlərin kirayə qiymətlərinin eyni nisbətdə ucuzlaşması kimi qiymətləndirilməsinin düzgün olmadığını vurğulayıb. Azalmaya təsir edən əsas amillər aşağıdakılardır:
-
Mövsümi faktor: Yay mövsümündə yüksək qiymətlərlə təklif olunan bağ evləri və villaların elanlardakı payının azalması;
-
Uzunmüddətli təkliflər: Mövsümi kirayələrin başa çatması və uzunmüddətli kirayə təkliflərinin üstünlük qazanması;
-
Struktur dəyişikliyi: Müşahidə olunan obyektlərin ərazi və xüsusiyyətlər üzrə tərkibinin dəyişməsi.
© realist.az
Arzu, təklif və şikayətlərinizi bizə bildirin