Fransa da vətəndaşlarına müraciət etdi: 3 günlük fövqəladə ehtiyat çantası hazırlayın
Qərb ölkələrində mülki müdafiə və böhranlara hazırlıq xəbərdarlıqları genişlənir. Fransa rəsmi hakimiyyət orqanları ölkə vətəndaşlarına çağırış edərək, onları baş verə biləcək fövqəladə hallara qarşı 72 saatlıq (3 günlük) xüsusi ehtiyat dəsti hazırlamağa səsləyib.
“Realist.az”ın məlumatına görə, rəsmi müraciətdə böhran anında həyatda qalmaq üçün təcilən toplanması vacib olan əşyaların siyahısı açıqlanıb.
Fövqəladə hallar çantasında nə olmalıdır?
Mütəxəssislər hazırlanan təcili yardım çantasına aşağıdakı zəruri vasitələrin daxil edilməsini tövsiyə edirlər:
-
Təmiz içməli su və uzunömürlü (konservləşdirilmiş) qida məhsulları;
-
Fənər və batareya ilə işləyən radioqəbuledici;
-
İlk tibbi yardım çantası və mütəmadi istifadə edilən zəruri dərmanlar;
-
İsti geyim və ədyal;
-
Xarici enerji batareyası (powerbank) və zaryadkalar;
-
Nağd pul və şəxsiyyəti təsdiq edən vacib sənədlərin surətləri.
Fransa rəsmiləri bu dəsti hər an əl çatan yerdə saxlamağı, ildə azı bir dəfə son istifadə tarixlərini yoxlamağı və istifadə edildikdən sonra ehtiyatları dərhal yeniləməyi məsləhət görürlər.
Qlobal böhran həyəcanı: Analoji addımlar digər ölkələrdə də atılır
Qeyd edək ki, Fransanın bu addımı təcrid olunmuş bir qərar deyil. Son aylarda Böyük Britaniya, Yaponiya və bir sıra İskandinaviya ölkələri də analoji tövsiyələrlə çıxış edərək öz əhalisini olası təbii fəlakətlərə, infrastruktur qəzalarına və ya hərbi-siyasi böhranlara qarşı hazırlıqlı olmağa çağırıblar.
© realist.az
Arzu, təklif və şikayətlərinizi bizə bildirin