Azərbaycanda ümumi təhsil üzrə yeni standartlar sənədi hazırlanır
Azərbaycanda ümumi təhsil sistemində köklü yenilikləri nəzərdə tutan yeni standartlar sənədinin hazırlanması prosesi davam edir.
Realist.az xəbər verir ki, bu barədə VII Ümumdünya Mədəniyyətlərarası Dialoq Forumu çərçivəsində keçirilən “Mədəniyyətlərarası dialoq, təhsil və rəqəmsal transformasiya” mövzusundakı sessiyada Təhsil İnstitutunun direktor səlahiyyətlərini müvəqqəti icra edən Elnur Əliyev məlumat verib.
O bildirib ki, sənədin bu ilin sonuna qədər tamamlanması planlaşdırılır.
Təhsildə yeni yanaşma və rəqəmsal vətəndaşlıq
Elnur Əliyevin sözlərinə görə, yeni sənəd mədəniyyətlərarası dialoqa və rəqəmsal vətəndaşlığa ciddi təsir göstərəcək fərqli bir yanaşmanı özündə əks etdirir:
“İlk növbədə, yeni sənəddə səriştələr üzrə əlavə çərçivə olacaq. Bu çərçivədə vətəndaşlıq ayrıca bir səriştə kimi müəyyənləşdirilir. Bu isə irəliyə doğru atılmış çox mühüm addımdır.”
Fənlərarası inteqrasiya və 4 əsas komponent
Yeni standartların fənlərarası xarakter daşıdığını vurğulayan E.Əliyev bəyan edib ki, bütün fənlərin birgə inkişaf etdiriləcəyi ümumfənlərarası bacarıqlar nəzərdə tutulur. Yəni mədəniyyətlərarası dialoq və rəqəmsal vətəndaşlıq kimi səriştələr üzərində yalnız bir fənn deyil, müxtəlif fənlər öz tədrisi çərçivəsində işləyəcək.
Yeni səriştə modelinin dörd əsas komponenti daxildir:
-
Bilik
-
Bacarıqlar
-
Münasibətlər
-
Dəyərlər
Bu komponentlər ibtidai siniflərdən başlayaraq orta və yuxarı siniflərədək məktəbin bütün pillələrində, eləcə də hər bir fəndə inteqrasiya olunacaq.
© realist.az
Arzu, təklif və şikayətlərinizi bizə bildirin