Azərbaycan millisi FIFA U-15 dünya çempionatında son matçına çıxır: Rəqib Əfqanıstandır
Azərbaycanın U-15 futbol millisi Bakıda təşkil olunan FIFA U-15 dünya çempionatı və festivalında bu gün sonuncu qarşılaşmasını keçirəcək.
“Realist.az”ın məlumatına görə, baş məşqçi Famil Xəlilovun rəhbərlik etdiyi yığma komandamız turnirdə 83-cü yer uğrunda Əfqanıstan seçməsi ilə üz-üzə gələcək.
Hövsan Olimpiya Kompleksində baş tutacaq görüş saat 11:30-da başlayacaq.
Millimizin turnir yolu: Qrup mərhələsindən C Divizionunadək
Xatırladaq ki, Azərbaycan komandası AF qrupunda mübarizə apararaq 3-cü yeri tutub və C Divizionuna vəsiqə qazanıb. Qrup oyunlarında yığmamız aşağıdakı nəticələri göstərib:
-
Qələbələr: Timor-Leste (6:0), Andorra (1:0), İsrail (3:1);
-
Məğlubiyyətlər: Avstraliya (1:3), Haiti (0:4).
Qrup mərhələsini 9 xalla başa vuran yığma mübarizəni C Divizionunda (81-96-cı yerlər uğrunda) davam etdirib. Komandamız bu diviziondakı qarşılaşmalarda Çili (1:3) və Vyetnam (2:4) seçmələrinə uduzsa da, Cəbəllütariq (5:1) və Mozambik (4:1) millilərinə kəsərli qələbələrlə üstün gəlib.
189 ölkənin qatıldığı mundialda final həyəcanı
Qeyd edək ki, nəhəng idman tədbirində FIFA-ya üzv olan 189 ölkənin komandaları iştirak edir və çempionat çərçivəsində 1000-ə yaxın oyun keçirilir.
Bu gün yekun vurulacaq U-15 dünya çempionatının qarşılaşmaları Hövsan Yarış Kompleksində təşkil olunub. Turnirin möhtəşəm final görüşü isə Bakı Kristal Zalında gerçəkləşəcək.
© realist.az
Arzu, təklif və şikayətlərinizi bizə bildirin