İsrail prezidentinin rezidensiyasında şübhəli əşya tapıldı – İstehkamçılar əraziyə çağırıldı

İsrail Prezidenti İshaq Hersoqun rezidensiyasında parlament fraksiyaları ilə məsləhətləşmələr başlamazdan əvvəl keçirilən baxış zamanı şübhəli əşya aşkar edilib.

Realist.az-ın məlumatına görə, hadisə yerinə dərhal istehkamçılar çağırılıb. Hadisə yeni hökumətin formalaşdırılması üzrə rəsmi danışıqlar raundu ərəfəsində baş verib.

Təhlükəsizlik tədbirlərinə baxmayaraq, Prezident Hersoq baş nazir postuna namizəd tövsiyə etməli olan partiya nümayəndələri ilə məsləhətləşmələrə başlayıb.

Siyasi proses seçkilərə ehtimal olunan xarici müdaxilənin araşdırılması fonunda cərəyan edir. Mərkəzi Seçki Komissiyasının sədri Noam Solberq İsrail siyasətinə təsir göstərmək üçün xaricdən böyük həcmdə vəsaitlərin daxil olması ilə bağlı şübhələrin olduğunu bildirib. Bununla belə, o vurğulayıb ki, mövcud şübhələr səsvermənin nəticələrini sual altına qoymur və hökumətin formalaşdırılmasına mane olmur.