Millimiz üçün 6:0-dan sonra növbəti sınaq: Sırada Andorra və Avstraliya var

Bakıda U-15 dünya çempionatı: Millimiz bu gün Andorra və Avstraliya ilə üz-üzə gəlir

Bakıda keçirilən FIFA U-15 dünya çempionatı və festivalında mübarizə aparan Azərbaycan milli komandası bu gün növbəti matçlarına çıxacaq.

“Realist.az”ın məlumatına görə, baş məşqçi Famil Xəlilovun yetirmələri gün ərzində iki vacib görüş keçirəcəklər:

• Saat 12:45: Azərbaycan – Andorra

• Saat 19:30: Azərbaycan – Avstraliya

Hər iki qarşılaşma Hövsan Yarış Kompleksinin 10A meydançasında baş tutacaq.

Möhtəşəm start: İlk oyunda 6:0 hesablı qələbə

Xatırladaq ki, milli komandamız turnirdəki ilk matçında Timor-Leste yığması ilə qarşılaşıb. Bakı Kristal Zalında təşkil olunan həmin görüş millimizin 6:0 hesablı darmadağınlı qələbəsi ilə başa çatıb.

U-15 millimizin növbəti gün üçün oyun cədvəli:

• 26 oktyabr (saat 11:30): Azərbaycan – İsrail (Hövsan Yarış Kompleksi)

• 26 oktyabr (saat 18:15): Azərbaycan – Haiti (Hövsan Yarış Kompleksi)

Turnirdə 189 ölkə yarışır

Qeyd edək ki, mötəbər turnirdə dünyanın 189 ölkəsindən FIFA-ya üzv assosiasiyaları təmsil edən komandalar iştirak edirlər. Çempionat çərçivəsində ümumilikdə 1000-ə yakın oyunun keçirilməsi planlaşdırılır.

Oktyabrın 30-da başa çatacaq U-15 dünya çempionatının oyunları Hövsan Yarış Kompleksində, turnirin çempionunu müəyyənləşdirəcək final görüşü isə Bakı Kristal Zalında keçiriləcək.