Avropada miqrant axını, sərhəd nəzarəti və qonşu dövlətlərin məsuliyyəti məsələsi ətrafında debatlar yenidən kəskinləşib. 2015-ci il böhranından 11 il keçməsinə baxmayaraq, problem öz aktuallığını itirməyib.
Realist.az xəbər verir ki, Aİ-nin oktyabr sammitində Varşava, Roma və Kopenhagenin təmsil olunduğu yeni və sərt bir alyans formalaşıb.
Polşa, İtaliya və Danimarka baş nazirləri qonşu ölkələrin miqrasiya özbaşınalığına son qoyulmasını açıq şəkildə tələb ediblər: “Birtərəfli qərar verib, nəticələrini başqalarının üzərinə atmağa son qoyun!”
Şengen zonası daxilində yoxlamalar bərpa olunur
Məsələnin kökündə avropalıların miqrasiya ilə bağlı vahid yanaşmaya malik olmaması dayanır. Bəzi hökumətlər ölkəyə giriş qaydalarını sərtləşdirdiyi halda, digərləri bütün regiona təsir edən addımlar atırlar. Nəticədə, dövlətlər insanların sərbəst hərəkəti üçün yaradılmış Şengen zonasının daxili sərhədlərində yoxlamaları bərpa etmək məcburiyyətində qalırlar.
2015-ci ildə Anqela Merkelin “Biz bunun öhdəsindən gələcəyik” ifadəsi kütləvi xaos, İttifaq daxilində parçalanma və “azad Avropa” daxilində ilk çəpərlərin çəkilməsi ilə nəticələnmişdi.
Sərbəst hərəkət prinsipi təhlükədədir
Hazırda tarix təkrar olunur: Avropa liderləri vahid qaydalar barədə razılığa gəlməyə çalışsalar da, hər kəs ilk növbədə öz seçicilərini və milli təhlükəsizliyini düşünür.
Şengen zonası formal olaraq qüvvədə qalsa da, daxili sərhədlər tədricən Avropanın siyasi gündəliyinə qayıdır. Avropa İttifaqının fəxr etdiyi sərbəst hərəkət prinsipini qoruyub saxlamaq miqrasiya böhranı dərinləşdikcə daha da çətinləşir.
© realist.az
Arzu, təklif və şikayətlərinizi bizə bildirin